Ant. ad introitum Mal 3, 23-24
Ecce ego mittam vobis Elíam prophétam,
ántequam véniat dies Dómini magnus et horríbilis;
et convértet cor patrum ad fílios et cor filiórum ad patres eórum.
Collecta
Omnípotens sempitérne Deus,
qui beáto Elíæ prophétæ in conspectu tuo vívere
eúmque zelo glóriæ tuæ zeláre tribuísti,
concéde fámulis tuis
ut, fáciem tuam semper inquiréntes,
dilectiónis tuæ testes fíeri mereántur.
Per Dóminum nostrum Iésum Christum Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
LECTIO PRIMA
Sic amplificatus est Elias in mirabilibus suis
Léctio libri Sirácidæ 48, 1-4. 9-11
In diébus illis:
Surréxit Elías prophéta quasi ignis,
et verbum ipsíus quasi fácula ardébat.
Qui indúxit in illos famem
et zelo suo paucos fecit eos.
Verbo Dómini contínuit cælum
et deiécit de cælo ignem ter.
Quam amplificátus es, Elías, in mirabílibus tuis!
Et quis potest simíliter gloriári tibi?
Qui recéptus es in túrbine ignis
et in curru equórum igneórum;
qui scriptus es parátus in témpora
leníre iracúndiam Dómini ante furórem,
convértere cor patris ad fílium
et restitúere tribus Iacob.
Beáti sunt, qui te vidérunt
et in amicítia tua dormiérunt!
Verbum Dómini.
PSALMUS RESPONSORIUS Ps 144, 17-18. 19-20. 21(R.: 18)
R.: Prope est Dóminus ómnibus invocántibus eum.
17 Iustus Dóminus in ómnibus viis suis
et sanctus in ómnibus opéribus suis.
18 Prope est Dóminus ómnibus invocántibus eum,
ómnibus invocántibus eum in veritáte. R.
19 Voluntátem timéntium se fáciet
et deprecatiónem eorum exáudiet et salvos fáciet eos.
20 Custódit Dóminus omnes diligéntes se
et omnes peccatóres dispérdet. R.
21 Laudatiónem Dómini loquétur os meum,
et benedícat omnis caro nómini sancto eius
in sǽculum et in sǽculum sǽculi. R.
ALLELUIA Mt 17, 5
R. Allelúia. V. Hic est Fílius meus diléctus, in quo mihi bene complácui:
ipsum audite. R. Allelúia.
EVANGELIUM
Moyses et Elias dicebant exodum eius.
Léctio sancti Evangélii secúndum Lucam 9, 28b-36
In illo témpore:
Assúmpsit Iesus Petrum et Ioánnem et Iacóbum et ascéndit in montem, ut oráret. Et facta est, dum oráret, spécies vultus eius áltera, et vestítus eius albus, refúlgens. Et ecce duo viri loquebántur cum illo, et erant Móyses et Elías, qui visi in glória dicébant éxodum eius, quam completúrus erat in Ierúsalem. Petrus vero et qui cum illo graváti erant somno; et evigilántes vidérunt glóriam eius et duos viros, qui stabant cum illo.
Et factum est cum discéderent ab illo, ait Petrus ad Iesum: «Præcéptor, bonum est nos hic esse; et fáciamus tria tabernácula: unum tibi et unum Móysi et unum Elíæ», nésciens quid díceret. Hæc autem illo loquénte, facta est nubes et obumbrávit eos; et timuérunt intrántibus illis in nubem.
Et vox facta est de nube dicens: «Hic est Fílius meus eléctus; ipsum audíte». Et dum fíeret vox, invéntus est Iesus solus.
Et ipsi tacuérunt et némini dixérunt in illis diébus quidquam ex his, quæ víderant.
Verbum Dómini.
Super oblata
Múnera Ecclésiæ tuæ, quǽsumus, Dómine, propítius réspice,
et qui sacrifício Elíæ prophétæ mirabíliter affuísti,
hóstias quoque nostras suscípere dignéris.
Per Christum Dóminum nostrum.
Præfatio
V/. Dóminus vobíscum.
R/. Et cum spíritu tuo.
V/. Sursum corda.
R/. Habémus ad Dóminum.
V/. Grátias agámus Dómino Deo nostro.
R/. Dignum et iustum est.
Vere dignum et iustum est, ǽquum et salutáre,
nos tibi semper et ubíque grátias ágere:
Dómine, sancte Pater, omnípotens ætérne Deus:
per Christum Dóminum nostrum.
Ad te, Deum vivum et verum, confiténdum
eléctos prophétas suscitásti,
qui pópulum tuum erudírent in exspectatióne salútis.
Inter eos Elíam Thesbítem divína amicítia decorásti,
ut, zelo glóriæ tuæ zelátus,
omnipoténtiam et misericórdiam tuam manifestáret.
Ipsum quoque inter transfiguratiónis testes Christo adstáre voluísti,
ut Fílii tuii glorióso gaudéret aspéctu
qui tui in conspéctu semper ambulávit.
Et ídeo, cum cælórum Virtútibus,
in terris te iúgiter celebrámus,
maiestáti tuæ sine fine clamántes:
Sanctus, Sanctus, Sanctus Dóminus Deus Sábaoth.
Ant. ad communionem Cf. 1 Reg 19, 8
Comédit Elías et bibit,
et ambulávit in fortitúdine cibi illíus usque ad montem Dei.
Post communionem
In mensa Fílii tui, Dómine,
cibo potúque angélico roborátis, concéde
ut, te per fidem semper inquiréntes,
in monte glóriæ perénni tuo fruámur aspéctu.
Per Christum Dóminum nostrum.
